பல லட்ச ரூபாய் மோசடி செய்த சீட்டுக் கம்பெனி உரிமையாளரை கைது

     கடலூரில் பல லட்ச ரூபாய் மோசடி செய்த சீட்டுக் கம்பெனி உரிமையாளரை கைது செய்யக்கோரி பொதுமக்கள் சாலைமறியலில் ஈடுபட்டனர்.

    கடலூர் கூத்தப்பாக்கம் பகுதியைச் சேர்ந்த மன்னன் உதயகுமார் என்பவர், போடி செட்டித் தெருவில் மன்னன் சிட்ஸ் என்ற பெயரில் சீட்டுக்கம்பெனி நடத்தி வருகிறார்.

   இவர், 600 ரூபாய் கட்டினால், 45 நாட்களுக்குப் பிறகு 20,000 ரூபாய் கடன் தருவதாகக் கூறி மகளிர் சுய உதவிக் குழுக்களைச் சேர்ந்த ஆயிரத்துக்கும் மேற்பட்ட பெண்களிடம் பணம் வசூல் செய்துள்ளார்.

   மேலும் ஒரு லட்சம், இரண்டு லட்சம் என சீட்டும் நடத்தி வந்திருக்கிறார். பணம் கட்டி பல மாதங்களாகியும் சொன்னபடி கடன் தராமல் உதயகுமார் காலம் கடத்தி வந்ததையடுத்து, பாதிக்கப்பட்ட பெண்கள் சீட்டுக் கம்பெனி முன்பாக சாலை மறியலில் ஈடுபட்டனர்.

   உதயகுமார் தமிழக அமைச்சர் ஒருவரின் நெருங்கிய நண்பர் எனக்கூறி அவருடன் தாம் எடுத்துக்கொண்ட புகைப்படத்தை சீட்டுகம்பெனியில் மாட்டிவைத்திருந்ததைக் கேள்விப்பட்ட ஆளும்கட்சித் தொண்டர்கள், உதயகுமாரால் கட்சிக்கு அவப்பெயர் ஏற்படுவதாகக் கூறி அவரை சரமாரியாக அடித்து உதைத்தனர்.

   அப்போது அங்கு வந்த காவல்துறையினர் உதயகுமாரை மீட்டு  விசாரணை நடத்தி வருகின்றனர். பாதிக்கப்பட்டவர்கள் கொடுக்கும் புகாரின் அடிப்படையில் உரிய நடவடிக்கை எடுக்கப்படும் என்று காவல்துறையினர் தெரிவித்தனர்.

கடலூரில் போதையில் இருந்தவரிடமிருந்து 1 கிலோ தங்கம் பறிமுதல்

  கடலூர் பேருந்து நிலையத்தில் போதையில் தூங்கிக் கொண்டிருந்த நபரிடம் இருந்து ஒரு கிலோ தங்கம் கைப்பற்றப்பட்டுள்ளது.

  நேற்று நள்ளிரவு காவல்துறையினர் மேற்கொண்ட ரோந்தின்போது, சந்தேகத்தின்பேரில் அவரிடம் காவல்துறையினர் விசாரித்தனர். அவரிடம் இருந்த தங்கம் மற்றும் பணம் உள்ளிட்டவற்றை காவல்துறையினர் பறிமுதல் செய்தனர்.

  போதையில் இருந்த நபர் பெயர் கிருபானந்த வாரியார் என்பதும் கடலூரை சேர்ந்த இவர் நகை தொழிலாளர் என்பதும் தெரியவந்துள்ளது. இவரிடம் இருந்த தங்க கட்டிகளுக்கு முறையான ஆவணம் இல்லாததால் அதுபற்றி காவல்துறையினர் விசாரணையை தொடர்ந்து வருகிறார்கள்.

கடலூரில் பொய்த்து போகும் விவசாயம்: விவசாயிகள் வேதனை

பருவமழை பொய்த்து போனதாலும், தொடர் மின்வெட்டாலும் கடலூர் மாவட்டம் பண்ருட்டி அருகே உள்ள குச்சிபாளையத்தில் பயிர்கள் கருகிவிட்டதாக விவசாயிகள் வேதனை தெரிவித்துள்ளனர்.

தானே புயலின் தாக்கத்தில் உருக்குலைந்து போன விவசாயம், தற்போது பெரும் ஏமாற்றம் அளித்துள்ளதாக விவசாயிகள் கூறுகின்றனர். இதே நிலை தொடர்ந்தால் விவசாயம் முற்றிலும் முடங்கிவிடும் எனவும் அவர்கள் தெரிவித்துள்ளனர்.

தோட்டக்கலை துறை அதிகாரிகள் அலட்சம் காட்டுவதாகவும், இதனால், 400 ஏக்கருக்கும் அதிகமாக பயிர் செய்த நிலை மாறி தற்போது 40 ஏக்கர் மட்டுமே பயிர் செய்வதாக விவசாயிகள் தெரிவித்துள்ளனர்.

                                          - நாகை மகாகிருஷ்ணன்

கடலூரில் ஓய்வுபெற்ற காவலர்களின் பணம் பலகோடி ரூபாய் மோசடி

 

       கடலூரில் ஓய்வுபெற்ற காவலர்களின் பணம் பலகோடி ரூபாய் மோசடி செய்யப்பட்டிருப்பது தெரியவந்துள்ளது.

சிதம்பரத்தில் பணியாற்றி ஓய்வுபெற்ற காவலர் செல்வராஜ் என்பவர், தமக்கு வரவேண்டிய பணிக்கொடை பணம் வராதது குறித்து மாவட்ட கருவூல அதிகாரிகளிடம் விசாரித்துள்ளார். ஆனால், அவருக்கு சேர வேண்டிய பணம் முழுவதும் வங்கி மூலம் அனுப்பப்பட்டுவிட்டதாக கருவூல அதிகாரிகள் கூறியுள்ளனர்.

இதனையடுத்து, வங்கியில் சென்று விசாரித்தபோது, செல்வராஜுக்கு அனுப்பப்பட்டட காசோலைகள் அனைத்தும் வேறு ஒருவரது வங்கிக் கணக்கில் போடப்பட்டு, பணம் எடுக்கப்பட்டிருப்பது தெரியவந்தது. இதேபோன்று, கோடிக்கணக்கில் பலரது பணம், மோசடி செய்யப்பட்டிருப்பது உறுதி செய்யப்பட்டுள்ளது.

இதுதொடர்பாக, முரளி என்ற ஓய்வுபெற்ற காவலரிடம் காவல்துறையினர் விசாரணை நடத்தி வருகின்றனர். செந்தில் என்பவரை தேடி வருகின்றனர். இதேபோன்று, இறந்துபோன காவலர்கள் பலரது பணமும் மோசடி செய்யப்பட்டுள்ளதாக கூறப்படுகிறது.

-நாகை மகாகிருஷ்ணன்

கழிவுகளால் மாசுபடும் கெடிலம் ஆறு

   கடலூர் நெல்லிக்குப்பம் அருகே கெடிலம் ஆற்றில் கழிவுகள் கலப்பதால் ஆயிரக்கணக்கான மீன்கள் செத்து மிதக்கின்றன.

இச்சம்பவம் தொடர்ந்து நடப்பதாகவும், மீன்களை நாய்களும், காகங்கள் உள்ளிட்ட பறவைகளும் தூக்கிச் சென்று ஆங்காங்கே போட்டுவிடுவதால் நோய் தொற்றும் அபாயம் ஏற்படுவதாக பொதுமக்கள் கவலை தெரிவிக்கின்றனர்.

ஆயிரக்கணக்கில் மீன்கள் செத்துக்கிடப்பதால் அப்பகுதி முழுவதும் துர்நாற்றம் வீசுகிறது. நெல்லிக்குப்பத்தில் உள்ள தனியார் சர்க்கரை ஆலையின் கழிவுகள் கலப்பதாலும், நெல்லிக்குப்பம் நகராட்சியின் கழிவு நீர் கலப்பதாலுமே கெடிலம் ஆற்றில் அவ்வப்போது மீன்கள் செத்து மிதப்பதாகவும், நகராட்சி நிர்வாகத்தின் அலட்சியமே இதற்கு காரணம் என்றும் அப்பகுதி மக்கள் கூறுகின்றனர்.

                                 இணைய செய்தியாளர் - s.குருஜி

சிதம்பரத்தில் காவலர்கள் மீது தாக்குதல்

     கடலூர் மாவட்டம் சிதம்பரத்தில் காவல்துறையினர் மீது கொள்ளையன் ஒருவன் தாக்குதல் நடத்தியுள்ள நிகழ்வு அதிர்ச்சியை ஏற்படுத்தியுள்ளது. வாகன திருட்டில் தொடர்புடைய வெற்றிச்செல்வன் என்ற கொள்ளையன் வீட்டிற்கு நள்ளிரவில் காவல்துறையினர் சென்றனர்.

அப்போது பிரபு என்ற காவலரை மதுபான பாட்டிலால் தாக்கிவிட்டு தப்பியோட முயன்ற வெற்றிச்செல்வனை குமரேசன் என்ற காவலர் பிடிக்க முயன்றார். அவரை அரிவாள்மனையால் வெட்டிய கொள்ளையன் வெற்றிச்செல்வன் இருட்டில் தப்பியோடிவிட்டான்.

கொள்ளையனின் தாக்குதலில் காயமடைந்த காவலர்கள் இருவரும் மருத்துவமனையில் சிகிச்சைப் பெற்று வருகின்றனர். தப்பியோடிய கொள்ளையன் வெற்றிச்செல்வனை பிடிக்க கடலூர் காவல்துறையினர் தனிப்படை அமைத்துள்ளனர். தமிழகத்தில் அண்மைக்காலமாக காவல்துறையினர் மீதான தாக்குதல் அதிகரித்துள்ளது குறிப்பிடத்தக்கது.

இணைய செய்தியாளர் - s.குருஜி

எங்கிருந்து வந்தது டெங்கு?

       இன்று நாட்டையே உலுக்கிக் கொண்டிருக்கிறது டெங்கு. ஆப்பிரிக்க மொழியான ஸ்வாஹிலியில் இருந்து வந்ததுதான் டெங்கு என்ற சொல். ஸ்வாஹிலியில் டெங்கு என்ற சொல்லுக்குத் தீய சக்தி என்று பொருள். ஆப்பிரிக்காவில் உருவாகி இன்று உலகம் முழுவதும் பரவிவரும் டெங்கு நோயை ஏற்படுத்துவது டி. இ.என். எனப்படும் இந்த வைரஸ் கிருமிதான். இந்த கிருமி ஆற்றிலும் இல்லை, காற்றிலும் இல்லை. அது வாழ்வதோ இரண்டே இரண்டு இடங்களில்தான். ஒன்று மனித உடல். மற்றொன்று ஏடிஸ் ஏஜிப்டை என்ற ஒருவகை கொசு.

கொசுவைக் கண்டு அச்சம் - சிக்குன்குனியா கொசுதான் இதுவும் : பாம்பைக் கண்டால் படை நடுங்கும் என்பார்கள். இன்று டெங்கு கொசுவைக் கண்டு நாடே அஞ்சுகிறது. டெங்குவைப் பரப்பும் இந்த கொசு தமிழ்நாட்டுக்குப் புதியதல்ல. சில ஆண்டுகளுக்கு முன் நம்மை அச்சுறுத்திய சிக்கன்குனியா நோய்க்குக் காரணமான அதே கொசு வகைதான், இப்போது டெங்குவையும் பரப்புகிறது. பூந்தொட்டியோ, தண்ணீர் தொட்டிகளோ, பழைய டயரோ எங்கெல்லாம் தண்ணீர் தேங்குகிறதோ அங்கெல்லாம் உற்பத்தியாகும் இந்த டெங்கு கொசு.

பகலில் கடிக்கும் கொசு - நோய் பரப்பும் கொசு : மலேரியா போன்ற நோய்களைப் பரப்புகிற கொசு வகை இரவிலும், அதிகாலை வேளையிலும்தான் மனிதர்களைக் கடிக்கும். ஆனால், டெங்கு கிருமியைத் தாங்கிவரும் இந்தக் கொசு பட்டப்பகலில்தான் கடிக்கும். ஒருவரிடம் இருந்து மற்றொருவருக்கு நேரிடையாகப் பரவுவதல்ல டெங்கு. டெங்கு நோய் பாதித்த ஒருவரைக் கடித்து, ரத்தம் உறிஞ்சிய பிறகு, அதே கொசு இன்னொரு நபரைக் கடிப்பதன் மூலமே டெங்கு பரவுகிறது.

அறிகுறிகள் என்னென்ன?
கடுமையான காய்ச்சல், கண்களுக்குப் பின்னால் துளைத்தெடுக்கும் தலைவலி, உடல் வலி, தடை வலி, மூட்டு வலி, சோர்வு மற்றும் தோல்களில் செந்நிறத் தடுப்பு போன்றவை டெங்கு நோய்க்கான அறிகுறிகள். இவை அனைத்தும் டெங்கு கொசு கடித்த நான்கில் இருந்து ஏழு நாட்களுக்குள் தென்படும்.

கொசுக் கடியால் ஏற்படும் மாற்றம் : டெங்கு வைரஸ் கிருமியை தாங்கி வரும் ஏடிஸ் ஏஜிப்டை கொசு ஒரு நபரைக் கடித்தால் என்ன நடக்கும். டெங்கு வைரஸ் கிருமி அந்த நபரின் தோல் பகுதியிலிருந்து ரத்த ஓட்டத்திற்குள் நுழைகிறது. அங்கிருந்து அந்த வைரஸ் கிருமி WBC எனப்படும் வெள்ளை ரத்த அணுக்களின்உட்புறம் சென்றடைகிறது. அதன் விளைவாக ஏற்படுவது தான் டெங்கு காய்ச்சல், தலைவலி, தோலில் செந்நிற தடிப்பு போன்றவை. இதன் பிறகு டெங்கு கிருமி மேலும் வலுவடைந்து மேலும் மற்ற உறுப்புகளுக்குப் பரவுகிறது. அப்போது ஏற்படுவதுதான், டெங்கு காய்ச்சலின் மற்றொரு கடுமையான பரிமாணம் டெங்கு ஹெமராஜிக் பீவர் மற்றும் டெங்கு ஷாக். டெங்கு நோய் தாக்கும் நபர்களில் 5 சதவிகிதம் பேருக்குதான் டெங்கு நோயின் கடுமையான பரிமாணம் தென்படுகிறது.

கண்டுபிடிக்கப்படாத மருந்து : எல்லோரது மனதிலும் எழும் கேள்வி, டெங்கு நோய் குணப்படுத்தக் கூடிய ஒன்றா, இதற்கு மருந்து உண்டா என்பதுதான். டெங்கு கிருமியை நேரடியாக ஒடுக்கும் மருந்து, மாத்திரை எதுவும் இதுவரை கண்டுபிடிக்கப்படவில்லை என்பதே உண்மை. மலேரியா போன்ற நோய்களுக்கு இருக்கும் மருந்துகளோ சிகிச்சையோ டெங்கு நோய்க்குக் கிடையாது. காய்ச்சலைக் குறைப்பதற்கான மருந்து, நீர்ச்சத்து இழப்பை ஈடுசெய்யும் சிகிச்சை, வலி நிவாரணிகள் என்பன போன்ற மறைமுகமான சிகிச்சைகள்தான் உள்ளன.

வரும் முன் காப்பதே நல்லது : அதனால், உங்களைப் பாதுகாத்துக் கொள்வதற்கு சிறந்த வழி, வருமுன் காத்துக் கொள்வதுதான். வீட்டின் அருகே நீர் தேங்காமல் பார்த்துக் கொள்ளுங்கள். கொசு வலைகளைப் பயன்படுத்துங்கள். கொசுக்கடியில் இருந்து தப்பித்துக் கொள்ளும் வகையில், உடலை முழுமையாக மறைக்கும் ஆடைகளை அணியுங்கள்.

-பசுமை நாயகன்

கனமழை பெய்ய வாய்ப்பு: வானிலை ஆய்வுமையம் தகவல்

      தமிழகத்தின் வடகடலோர மாவட்டங்களிலும், புதுச்சேரியிலும் அடுத்த 24 மணி நேரத்துக்கு மழை பெய்யக் கூடும் என்று வானிலை ஆய்வு மையம் தெரிவித்துள்ளது. கன மழை காரணமாக, காஞ்சிபுரம் மாவட்டத்தில் பள்ளி கல்லூரிகளுக்கு விடுமுறை அறிவிக்கப்பட்டுள்ளது.

சில இடங்களில் கனமழை பெய்யவும் வாய்ப்புள்ளதாக தெரிவிக்கப்பட்டுள்ளது. தமிழகத்தின் வட கடலோர மாவட்டங்கள், புதுச்சேரி, ஆந்திராவின் தெற்கு கடலோர மாவட்டங்களில் மழையோ அல்லது இடியுடன் கூடிய மழையோ பெய்யக் கூடும் என்ற வானிலை ஆய்வு மையம் தெரிவித்துள்ளது. தமிழகத்தின் இதர பகுதிகளிலும் சில இடங்களில் மழை பெய்யும் என்று தெரிவிக்கப்பட்டுள்ளது. சென்னையை பொறுத்தவரை, வானம் மேகமூட்டத்துடன் காணப்படும் என்றும், அவ்வப்போது மழையோ இடியுடன் கூடிய மழையோ பெய்யும் என்றும் தெரிவிக்கப்பட்டுள்ளது.

காற்றழுத்த தாழ்வு நிலை காரணமாக, தமிழகம், புதுச்சேரி மற்றும் ஆந்திராவின் கடலோர பகுதிகளில், பலமான காற்று தென்கிழக்கு மற்றும் கிழக்கு திசையில் இருந்து மணிக்கு 45 முதல் 55 கிலோ மீட்டர் வேகத்தில் வீசும் என்றும் வானிலை ஆய்வு மையம் தெரிவித்துள்ளது. இதனிடையே தொடர் மழை காரணமாக, காஞ்சிபுரம் மாவட்டத்தில் உள்ள பள்ளி, கல்லூரிகளுக்கு விடுமுறை அளித்து, மாவட்ட ஆட்சியர் சித்திரசேனன் உத்தரவிட்டுள்ளார்.

-பசுமை நாயகன்

கடலூர் தீ விபத்து 18 பேர் காயமடைந்தனர்

கடலூர் ரசாயன தொழிற்சாலையை முற்றுகையிட்ட மக்கள் மீது போலீஸ் தடியடி

       கடலூர் – சிதம்பரம் கிழக்கு கடற்கரை சாலையில் செம்மரக்குப்பத்தில் அமைந்துள்ளது ஆர்க்கிமா பெராக்சைட்ஸ் இந்தியா பிரைவேட் லிமிட்டேட் என்ற தொழிற்சாலை. இந்த தொழிற்சாலைக்கு  சீனாவில் இருந்து ரசாயன திரவம் கொண்டு வரப்படுகிறது. அவ்வாறு கொண்டு வரப்பட்ட திரவத்தை தொழிற்சாலைக்குள் எடுத்துச் செல்லும் போது, நேற்று எதிர்பாராத விதமாக தீ விபத்து ஏற்பட்டது.

தொழிற்சாலையே தெரியாத அளவுக்கு கட்டுக்கடங்காமல் பற்றி எரிந்த தீயை, அணைப்பதற்காக ஒன்பது வாகனங்களில் வந்து இறங்கினர் தீணைப்பு வீரர்கள். சுமார் 6 மணி நேரம் போராட்டத்திற்கு பிறகு தீ கட்டுக்குள் வந்தது. தொழிற்சாலையில் பற்றி எரிந்த தீ விபத்தில் 2 தீயணைப்பு வீரர்கள் உட்பட 18 பேர் காயமடைந்தனர்.

விபத்தில் காயமடைந்தவர்கள் கடலூர் அரசு மருத்துவமனையில் சிகிச்சைக்கான அனுமதிக்கப்பட்டனர். அவர்களை பார்வையிட்ட மாவட்ட ஆட்சியர் ராஜேந்திர ரத்னூ, விபத்து குறித்து தொழிற்சாலை நிர்வாகத்திடம் விளக்கம் கேட்டுள்ளதாக கூறினார்.

போலீஸ் தடியடி : இதனிடையே விபத்து நடைபெற்ற தொழிற்சாலையை பொது மக்கள் முற்றுகையிட சென்றனர். செம்மரக்குப்பம் பகுதியில் அடிக்கடி விபத்து ஏற்படுவதால், அங்குள்ள தொழிற்சாலைகளை அகற்ற வேண்டும் என அப்பகுதி வாசிகள் கோரிக்கை வைத்தனர். விபத்துக்கு காரணமான தொழிற்சாலையை முற்றுகையிட முயன்ற மக்கள் மீது போலீசார் தடியடி நடத்தினர். இதனல் அங்கு சிறிது நேரம் பரபரப்பு ஏற்பட்டது.

-இணைய செய்தியாளர் - s.குருஜி

கடலூர் தீ விபத்து : உதவி மேலாளர் மற்றும் டெக்னீசியன் மீது வழக்கு பதிவு

       கடலூரில் ரசாயனத் தொழிற்சாலையில் ஏற்பட்ட தீ விபத்தால், அப்பகுதியே புகை மண்டலமாக மாறியுள்ளது. தொழிற்சாலையில் பற்றி எரிந்த தீ விபத்தில் தீயணைப்பு வீரர்கள் உட்பட 18 பேர் காயமடைந்தனர். விபத்துக்கு காரணமான தொழிற்சாலையை முற்றுகையிட முயன்ற மக்கள் மீது போலீசார் தடியடி நடத்தினர். இதனிடையே தொழிற்சாலையின் மேலாளர் மற்றும் டெக்னீஷியன் மீது போலீசர் வழக்குப்பதிவு செய்துள்ளனர்.

தொழிற்சாலை தீ விபத்தின்போது எழும்பிய புகையால்,  10 கிலோ மீட்டர் சுற்றளவு பரப்பில் உள்ள மக்கள் பாதிக்கப்பட்டுள்ளதாக கூறப்படுகிறது. 60க்கும் மேற்பட்ட மக்கள் மூச்சுத் திணறல் காரணமாக கடலூர் அரசு மருத்துவமனையில் சிகிச்சை பெற்று வருகின்றனர்.

ரசாயன தொழிற்சாலை தீ விபத்தினால், காற்று எந்த அளவுக்கு மாசடைந்துள்ளது என்பதை கணக்கிட தமிழ்நாடு மாசு கட்டுப்பாட்டு வாரிய அதிகாரிகள் சென்னையில் இருந்து இன்று கடலூர் விரைகின்றனர்.

-இணைய செய்தியாளர் - s.குருஜி

என்.எல்.சி., முத்தரப்பு பேச்சுவார்த்தை 21-ம் தேதிக்கு ஒத்திவைப்பு

    ஊதிய உயர்வு உள்ளிட்ட பல்வேறு கோரிக்கைகள் தொடர்பாக, புதுச்சேரியில் நடைபெறவிருந்த நெய்வேலி நிலக்கரி சுரங்க ஒப்பந்த தொழிலாளர் சங்கங்கள் மற்றும் நிர்வாகத்துக்கிடையேயான முத்தரப்பு பேச்சுவார்த்தை வரும் 21-ம் தேதிக்கு ஒத்தி வைக்கப் பட்டது.

முத்தரப்பு பேச்சு வார்த்தையில் கலந்துகொள்ள, தொழிற்சங்கங்கள் சார்பில் நிர்வாகிகள் வந்தும்,  நிலக்கரி சுரங்க நிர்வாகத்தின் தரப்பில் பங்கேற்க யாரும் வராததால், இந்த பேச்சுவார்த்தை வரும் 21-ம் தேதி நெய்வேலியில் நடைபெறும் என்று மத்திய தொழிலாளர் நல உதவி ஆணையர் சிவராஜ் அறிவித்தார்.  முன்னதாக, ஒப்பந்த தொழிலாளர்களின் கோரிக்கைகளை நிறைவேற்றுவதாக அறிவித்ததால் போராட்டத்தைக் கைவிட்டு பணிக்கு  தொழிலாளர்கள் திரும்பினார்கள்.

இந்நிலையில், உறுதியளித்த காலக் கெடுவுக்குள் எந்த கோரிக்கைகளையும் நிர்வாகம் நிறைவேற்றவில்லை எனக் கூறி மீண்டும் வேலைநிறுத்தப் போராட்டத்தை சில தொழிற்சங்கங்கள் அறிவித்தன.  இதனையடுத்து புதுச்சேரியில் உள்ள மத்திய தொழிலாளர் நல உதவி ஆணையர் சிவராஜ் நேற்று முத்தரப்பு பேச்சு வார்த்தைக்கு அழைப்பு விடுத்திருந்தார்.

  -இணைய செய்தியாளர் - s.குருஜி

கடல் அரிப்பால் வீடுகளை இழந்து தவிக்கும் மக்கள்

             புதுச்சேரியை ஒட்டி அமைந்துள்ள தமிழகத்தின் சின்ன முதலியார் சாவடி எனும் கிராமத்தில் கடந்த 10 ஆண்டுகளில் இரண்டு தெருக்கள் கடலால் சூழப்பட்டுவிட்டதாக மக்கள் தெரிவிக்கின்றனர்.

தொடர் கடல் அரிப்பே இதற்குக் காரணம் என்று மக்கள் கூறுகின்றனர். இவர்கள், ஊரின் மற்ற பகுதிகளும் கடல் அரிப்புக்குள்ளாகுமானால் தங்களின் நிலை என்னாகுமோ என்று அச்சம் கொள்கின்றனர்.

கடல் அரிப்பால் அழிந்து கொண்டிருக்கும் தங்கள் கிராமத்தைக் காப்பாற்ற அரசு தடுப்புச் சுவர் அமைத்துத் தர வேண்டும் என்று வேண்டுகோள் விடுக்கின்றனர். இதுவே நிரந்தரத் தீர்வாக அமையும் எனவும் அவர்கள் கூறுகின்றனர்.

புதுச்சேரியை ஒட்டி உள்ள பகுதி என்பதால், நடவடிக்கை எடுப்பதில் எல்லை ஒரு பிரச்சனையாக இருப்பதாக அதிகாரிகள் தரப்பில் தெரிவிக்கப்பட்டுள்ளது. எனினும் இந்த பிரச்சனைக்குத் தீர்வு காண நடவடிக்கை எடுக்கப்படும் என்று அவர்கள் தெரிவித்துள்ளனர்.

       -இணைய செய்தியாளர் - s.குருஜி

மணிக்கு 90 கி.மீ., வேகத்தில் காற்று வீசும் என எச்சரிக்கை

   தமிழக கடலோர மாவட்டங்களுக்கு மிகப் பெரிய அச்சுறுத்தலாக உருவெடுத்துள்ளது நீலம் புயல். வங்கக் கடலில் சென்னைக்கு தென் கிழக்கே 450 கிலோ மீட்டர் தொலைவிலும் இலங்கையின் திரிகோணமலைக்கு வடக்கு மற்றும் வட கிழக்காக 130 கிலோ மீட்டர் தொலைவிலும் இந்த புயல் மையம் கொண்டுள்ளது.

இது வடக்கு மற்றும் வட மேற்காக நகர்ந்து, கடலூருக்கும் நெல்லூருக்கும் இடையே, சென்னைக்கு அருகே இன்று மாலை கரையைக் கடக்கும் என சென்னை வானிலை ஆய்வு மையம் தெரிவித்துள்ளது. இதனால் அடுத்த 12 மணி நேரத்திற்கு தமிழகத்தின் கடலோர மாவட்டங்களிலும் புதுச்சேரியிலும் பலத்த மழை பெய்யும் என வானிலை ஆய்வு மையம் கூறியுள்ளது.

மேலும், தமிழகத்தின் வடபகுதிகளிலும் புதுச்சேரியிலும் மணிக்கு 45 முதல் 65 கிலோ மீட்டர் வேகத்தில் காற்று வீசக்கூடும் என்றும், ஆந்திராவின் தெற்கு பகுதியிலும் இதே அளவு காற்றின் வேகம் இருக்கும் என்றும் வானிலை ஆய்வு மையம் தெரிவித்துள்ளது.

இதன் காரணமாக கடல் மிக அதிக கொந்தளிப்புடன் இருக்கும் என்பதால் யாரும் கடல் பகுதிக்கு செல்ல வேண்டாம் என்று எச்சரிக்கை விடப்பட்டுள்ளது.

புயல் கரையைக் கடக்கும்போது, மணிக்கு 90 கிலோ மீட்டர் வேகத்திற்கு சூறைக் காற்று வீசக் கூடும் என்பதால், மின் கம்பங்கள், தொலைத்தொடர்பு வழித்தடங்கள் பாதிக்கப்படக் கூடும் என்றும் சென்னை வானிலை ஆய்வு மையம் எச்சரித்துள்ளது.

கடலோர மாவட்டங்களில் பலத்த மழை

       வங்கக்கடலில் நிலைக்கொண்டுள்ள நீலம் புயல் காரணமாக தமிழகத்தின் கடலோரா மாவட்டங்களில் பலத்த மழை பெய்து வருகிறது.

நாகை, கடலூர், புதுச்சேரி, சென்னை உள்ளிட்ட பகுதிகளில் பலத்த காற்றும் வீசி வருகிறது. சென்னை துறைமுகத்தில் 7ம் எண் எச்சரிக்கை கூண்டு ஏற்றப்பட்டிருக்கிறது. சென்னை வழியாக புயல் கரை கடக்கவிருப்பதால், 7ம் எண் எச்சரிக்கை கூண்டு ஏற்றப்பட்டிருப்பதாக தெரிவிக்கப்பட்டுள்ளது.

புயல் சின்னத்தால் காசிமேட்டில் கடல்  சீற்றத்துடன் காணப்படுகிறது.  வழக்கத்தை விட கடல் அலைகள் 5 அடி உயரத்திற்கு எழுகின்றன. இதனால் காசிமேடு மீனவர்கள் யாரும் கடலுக்குள் மீன்பிடிக்கச் செல்லவில்லை. சுமார் 5ஆயிரம் படகுகள் கரையில் நிறுத்தி வைக்கப்பட்டுள்ளன.

இதன் காரணமாக மீன்பிடி தொழில் பாதிக்கப்பட்டு்ள்ளதால், மீனவர்கள் இன்னலுக்கு ஆளாகியுள்ளனர். ஆகவே, அரசு தங்களுக்கு வழங்கும் நிவாரண  உதவியை உடனடியாக அளிக்க வேண்டும் என மீனவர்கள் கேட்டுக்கொண்டுள்ளனர்.

விதிவிலக்கான கன்னியாகுமரி

கன்னியாகுமரி மாவட்டத்தில் கடந்த சில நாட்களுக்கு முன்பு பெய்யத் தொடங்கிய மழை, நேற்று வரை தொடர்ந்தது. ஆனால், வங்கக் கடலில் நீலம் புயல் சின்னம் உருவான பிறகு கன்னியாகுமரியில் மழை பெய்வது முற்றிலும் நின்று விட்டது. காற்றின் வேகமும் குறைந்து விட்டது.

கன்னியாகுமரிக்கு அருகே உள்ள  தூத்துக்குடி துறைமுகத்தில் ஒன்றாம் எண் புயல் எச்சரிக்கை கூண்டு ஏற்றப்பட்ட நிலையிலும், இங்கு மழை தலை காட்டவில்லை. இங்கு மீனவர்கள் வழக்கம் போல் கடலுக்குள் மீன் பிடிக்கச் சென்றனர்.

மணல் விலை உயர்வுக்கு எதிர்ப்பு : கடலூர் அருகே லாரிகள் ஸ்டிரைக்

       கடலூர் மாவட்டம் கண்டரக்கோட்டையில் மணல் லாரிகள் வேலைநிறுத்தத்தில் ஈடுபட்டன. கண்டரக்கோட்டையிலுள்ள அரசு அனுமதி பெற்ற இரண்டாம் நிலை மணல் விற்பனை நிலையத்தில் திடீரென விலையை உயர்த்தியதற்கு எதிர்ப்பு தெரிவித்து போராட்டம் நடைபெற்றது.

400 ரூபாய் என்றிருந்த மணலின் விலையை 500 ரூபாயாக உயர்த்தப்பட்டுள்ளதாக லாரி உரிமையாளர்கள் புகார் தெரிவித்தனர். இந்த திடீர் விலையேற்றத்தைக் கண்டித்து ஆயிரத்துக்கும் அதிகமான லாரிகள், தென்பெண்ணை ஆற்றில் நிறுத்தப்பட்டன. பின்னர் அதிகாரிகள் லாரி உரிமையாளர்களுடன் பேச்சுவார்த்தையில் ஈடுபட்டனர்.

பழைய விலைக்கே மணலை விற்பதாக அதிகாரிகள் ஒப்புக்கொண்டதை அடுத்து, போராட்டத்தை லாரி உரிமையாளர்கள் கைவிட்டனர்.

சுற்றுச்சூழல்

நஞ்சில்லா உணவு 

மாசில்லா தண்ணீர் 

தூசில்லா காற்று

துன்பமில்லா வாழ்வு !

இவைகள் இந்த பூமியில் உள்ள அனைவருக்கும் உண்டாண உரிமை 

                                                               ஆனால்

நஞ்சுள்ள உணவு 

மாசுடைந்த தண்ணீர்

தூசி நிறைந்த காற்று

துன்பமிக்க வாழ்வு ! 

இவைதான் இன்றைய நிலை !

                           இந்த பூமியை ஆளுக்குஆள் பங்கு போட்டு கொண்டு மாசுபடுத்திவருகிறோம். வாகனங்களின் (பெருக்கம்) புகை, குப்பை எரிப்பு, சாயப்பட்றை கழிவுகள், தோல்பதனீட்டு கழிவுகள், பிளாஸ்டிக் தொழிற்ச்சாலைகள், பிளாஸ்டிக் பயன்பாடுகள், விவசாய நிலத்தில் ராசயாண உரம் மற்றும் பூச்சி கொல்லி இடுதல், மணல் கொள்ளை, மரம் வெட்டுதல், கணிமங்கள் சுரண்டுதல், குளங்கள, ஏரிகள் காணமல் போவது நகரமயம் என்று நீண்டு கொண்டபோகிறது.......?

          மக்களே (இளைஞர்கேள) விழித்தெழுங்கள் இந்த பூமியை காப்பபோம். நல்ல மண்வளம், சுத்தமான காற்று, தூய தண்ணீர், மும்மாரி மழை, முப்போக விளைச்சல், இயற்கையான விவசாய உற்பத்தி, நிறைந்த மரங்கள், வருடம் முழுவதும் நிறைந்த நீர் நிலைகள் என நாம் அடுத்த தலைமுறைக்கு பெற்று, விடடுச்செல்வோம். !

                                                                                  -பசுமை நாயகன்

பாரத ரத்னா – காங்கிரஸ் ரத்னா??

பாரத ரத்னா – காங்கிரஸ் ரத்னா??

*************************************************

 ப்ளேபாய் எனும் ஆங்கில கவர்ச்சி பத்திரிக்கைக்கு நிர்வாண போஸ் கொடுத்த ஷெர்லின் சோப்ரா எனும் மாடல் தனது சமூக பணிக்காக(!) பாரத ரத்னா விருது கோரியுள்ளாள். “I deserve Bharath Ratna” என்கிறாள். இந்த பாரத ரத்னா விருது எவ்வாறு வழங்கபடுகிறது யாரெல்லாம் வாங்கினார்கள் என்பதை பார்த்தால் இந்த விருதின் மதிப்பு விமர்சனத்துக்குரியதாகவே உள்ளது. விருது வாங்கியோர், வழங்கப்பட்ட காலம், அப்போதைய ஆட்சியாளர் என்று தோண்டி துருவி பார்த்தால் என் கருத்தின் உண்மை புரியும்.

நேரு குடும்பத்தில் மட்டும் மூவர் இவ்விருதை பெற்றுள்ளனர். இவர்களின் தியாகங்களையும், திறமைகளையும், தேச நலனுக்கான பங்களிப்பையும் இவர்கள் சம்பந்தப்பட்ட பல்வேறு ஊழல்/சமூக/போர் குற்றசாட்டுகளின் உண்மையை விவரம் தெரிந்தோர் எடுத்துரைத்தால் நலமாக இருக்கும். 

ஆனால் நேதாஜி, பகத்சிங், பெரியார், பாலம் கல்யானசுந்தரனார் இன்னும் கலை, இலக்கியம், விவசாயம், மருத்துவம், தொழில் போன்று பல்வேறு துறைகளில் சாதித்த பலரின் பெயர்கள் தவிர்க்கப்பட்டுள்ளது. இவர்களின் பொதுவான ஒற்றுமை காங்கிரஸ் எதிர்ப்பாளர்கள் என்பதே. விருதின் மரியாதையை உறுதி செய்ய சில நல்லோர்க்கும் வழங்கபட்டிருப்பினும், தேசியவாதி/சுதந்திர போராளிகள் என்று விருது பெற்றுள்ள சிலரை பார்த்தால் இந்தியன் படத்தில் தாமரை பட்டயம் கேட்ட விஸ்வநாதய்யர் கதாபாத்திரம் தான் நினைவுக்கு வருகிறது. இவர்கள் காங்கிரசின் குடும்ப ஆட்சிக்கு துணை நின்ற விசுவாசிகள். ஒருவேளை மக்களிடம் விருதுகளை திரும்ப பெறுவது குறிப்பான விழிப்புணர்வு ஏற்பட்டால் பலரின் நிலை கேளிக்கூத்தாகிவிடும்.

பாரத ரத்னாவுக்கே இந்த நிலையெனில் பத்ம விருதுகள், தேசிய திரைப்பட விருதுகள், ராணுவ விருதுகளின் நிலை..????

இவற்றையெல்லாம யோசிக்கும்போது ஷெர்லின் சோப்ராவின் கோரிக்கைக்கு பெரிதாக அதிர்சியடைய தேவையில்லை என்பது உண்மை.

-இணைய செய்தியாளர் - சசிகுமார்

தனியாக இருக்கும் போது மாரடைப்பு வந்தால் உங்களை நீங்களே எப்படி காப்பாற்றிக்கொள்வது ??

மாலை மணி 6:30,வழக்கம் போல் அலுவலகப் பணிகளை முடித்து விட்டு வீட்டிற்கு தனியாக சென்று கொண்டிருக்கிறீர்கள் . அலுவலகத்தில் வேலை பளுவின் காரணமாக, மற்றும் இதர சில பிரச்சனைகள் காரணமாக உங்கள் மனம் மிகவும் அழுத்தத்துடன் உள்ளது, நீங்கள் மிகவும் படபடப்பாகவும், தொய்வாகவும் உள்ளீர்கள் , திடீரென்று உங்கள் இதயத்தில் அதிக வலி ஏற்படுவதை உணர்கிறீர்கள்.

அந்த வலியானது மேல் கை முதல் தோள்பட்டை வரை பரவுவதை உணருகிறீர்கள் , உங்கள் வீட்டில் இருந்து மருத்துவமனை ஒரு ஐந்து மைல் தூரத்தில் இருப்பதாக வைத்துக்கொள்வோம், ஆனால் உங்களால் அந்த ஐந்து மையில் தூரத்தை கடக்க முடியாது என உங்கள் மூளை உங்களுக்கு சொல்கிறது இந்த நேரத்தில் நம் உயிரை நாமே காக்க என்ன செய்யலாம் ??
துரதிஷ்ட வசமாக மாரடைப்பு ஏற்படும் போதெல்லாம் இறப்பவர்கள் அதிகமாக தனியாக இருந்திருப்பவராக உள்ளனர் ! உங்கள் இதயம் தாறுமாறாக துடிக்கிறது..நீங்கள் சுயநினைவை இழக்க வெறும் 10 நொடிகள் தான் உள்ளது. இப்போது நீங்கள் செய்ய வேண்டியது தொடர்ச்சியாக மிக ஆக்ரோஷமாக இரும்ப வேண்டும், ஒவ்வொரு முறை இரும்புவதர்க்கு முன்னரும் மூச்சை இழுத்து விட வேண்டும் , இருமல் மிக ஆழமானதாக இருக்க வேண்டும்.

இருதயம் இயல்பு நிலை திரும்பும் வரையிலோ அல்லது வேறொருவர் உதவிக்கு வரும் வரையிலோ ஒவ்வொரு இரண்டு நொடிக்கும் மூச்சை இழுத்து விட்டு இரும்முக்கொண்டே இருக்க வேண்டும். மூச்சை இழுத்து விடுவதினால் நுரை ஈரலுக்கு ஆச்சிஜன் சீராக செல்ல வழி வகுக்கிறது , இருமுவதால் இருதயம் நிற்பதில் இருந்து தொடர்ச்சியாக துடித்துக்கொண்டே இருக்க உதவும், இதனால் ரத்தஓட்டம் சீரடையும்.

இருமுவதால் ஏற்படும் அதிர்வினால் இதயம் சீராக துடிக்கும்..பின்னர் இருதயம் சீரடைந்ததும் அருகில் உள்ள மருத்துவமனைக்கு செல்லலாம்..இந்த தகவலை குறைந்தது உங்களின் பத்து நண்பர்களுக்காவது பகிருங்கள்..தேவை இல்லாத விசயங்களையும், ஜோக்குகளையும் பகிர்வோர் , உயிரை காக்கும் இது போன்ற விசயங்களையும் பகிருங்கள்...

                                                                                             -தேனி முருகேஸ்வரன்

 

அன்பான உறவுகளே இன்று +2 ரிஸல்ட் வெளியாகிறது ..வெற்றி பெறும் பிள்ளைகளை மேலும் ஊக்கப்படுத்துங்கள் தோல்வி பெறும் பிள்ளைகளுக்கு நம்பிக்கையை ஏற்படுத்துங்கள் காயப்படுத்திவிடாதீர்கள் இன்றைய தோல்வி நாளைய இமாலய வெற்றிக்கு அடித்தளம் என்பதை கூறி அரவணையுங்கள் குறிப்பாக பெண்பிள்ளைகள் மிகவும் சோர்ந்துவிடுவார்கள் அன்போடு அரவணைத்து அவர்களின் சோர்வான மனநிலையை மாற்றுவதே அவர்களின் எதிர்காலத்துக்கான அருமருந்து ....         

                                                                                                                    

மாணவர்களின் எதிர்காலம் அக்கரையில்   -சிபிசந்தர்